التقويم الشفاف يعتبر من أحسن الحاجات اللي حصلت في مجال تقويم الاسنان واكترها تطورا. لو وصلت للمقال ده يبقى غالبا انت مهتم انك تظبط شكل ابتسامتك واسنانك وبتدور على وسيلة تعمل ده من غير ما يبان انك مركب جهاز تقويم على اسنانك وغالبا سمعت عن وجود نوع من انواع تقويم الاسنان اسمه التقويم الشفاف وعايز تعرف معلومات عنه اكتر والفرق ما بينه وما بين انواع التقويم الاخرى زي التقويم المعدني الثابت والتقويم السيراميكي … الخ. التقويم المعدني الثابت مفيش شك انه جهاز فعال جدا وبيقدر انه يعالج اي نوع من حالات تقويم الاسنان سواء السهلة أو الصعبة وكمان بيمكن أخصائي التقويم من أنه يحقق اي حركة تقويمية محتاج يعملها على الاسنان. رغم التطورات اللي حصلت في مجال تقويم الاسنان ما زال جهاز التقويم المعدني الثابت هو الgold standard لو بندور على جهاز يوصلنا لافضل نتيجة علاجية على المستوى الجمالي والوظيفي في أي نوع من حالات تقويم الاسنان. علشان كدة حتلاقي دايما الاطفال والشباب الصغيرين في مرحلة الدراسة والجامعة معندهمش مشكلة في عمل التقويم باستخدام جهاز التقويم المعدني.  الفكرة لما شخص في مرحلة العشرينات او التلاتينات أو لو حتى اكبر من كدة محتاج يعمل تقويم لاسنانه بسبب مشاكل في اصطفاف الاسنان أو مشاكل في اطباق الفكين او لأي سبب، اتخاذ القرار بتركيب التقويم عند الأشخاص دول بيبقى اصعب شوية لأنهم مدركين ان جهاز التقويم التقليدي بطبيعته ملفت والناس اللي حواليهم حياخدوا بالهم من وجود جهاز التقويم على الاسنان. طبعا في الوقت الحالي معظم الناس بقت متعلمة وعندها وعي كويس, وعادي وطبيعي جدا ان أي شخص في أي عمر يركب أي نوع من أنواع اجهزة التقويم طالما العلاج حيفيده والنتيجة اللي حيوصل لها حتحسن من شكل ابتسامته ومن ثقته بنفسه وحتنعكس عليه بالايجاب.

مع تطور التكنولوجيا في مجال طب الاسنان وفي مجال تقويم الاسنان على الخصوص ظهر في نهاية تسعينات القرن الماضي تكنيك العلاج التقويمي بالقوالب الشفافة. فكرة العلاج بالتقويم الشفاف تعتمد على تصنيع عدد من القوالب الشفافة المتتالية والمتدرجة في درجة اصطفاف الاسنان بحيث كل قالب شفاف يحرك الاسنان الغير منتظمة بمقدار بسيط جدا وبعد كدة ينتقل المريض للقالب الشفاف التالي عشان يستكمل تحريك الاسنان بمقدار بسيط وهكذا كل قالب شفاف بيكمل ورا القالب الشفاف اللي قبله حتى الوصول للاصطفاف المطلوب للاسنان. القوالب الشفافة دي مصنوعة من مادة طبية بلاستيكية (بولي يوريثان حراري) ليها خصائص تساعدها انها توفر القوة المطلوبة علشان تحرك الاسنان في الاتجاه المطلوب. طبعا شركة انفيزالاين الامريكية هي اول شركة في العالم في مجال التقويم الشفاف وما زالوا من رواد صناعة التقويم الشفاف، مع التطور في مجال الصناعة وتطور مجال الطباعة ثلاثية الابعاد وانتشار طابعات ال 3D Printing ما بقاش التقويم الشفاف دلوقتي مقتصر على شركة انفيزالاين فقط ولكن شركات كتير ظهرت في مجال التقويم الشفاف واصبحت لها قدرة تنافسية عالية مع شركة انفيزالاين. كمان خلال الربع قرن اللي فات من نهاية التسعينات لحد دلوقتي اتعمل ابحاث طبية كتير جدا من باحثين تقويم الاسنان ومن اقسام تقويم الاسنان على مستوى العالم كله وظهرت تقنيات كتير في التقويم الشفاف ساعدت انه يقدر يعالج عدد كبير من اصناف حالات التقويم ويحقق عدد كبير من الحركات التقويمية للاسنان واللي مكانتش متاحة من عشرين سنة مثلا. وده اللي حول التقويم الشفاف من مجرد غاية او سلعة بيتم التسويق ليها لوسيلة وأداة من أدوات اخصائي التقويم يقدر يستخدمها مع أدوات تانية واجهزة تقويمية تانية علشان يقدر يوصل للنتيجة المنتظرة من الخطة العلاجية. زمان كان التقويم الشفاف متاح فقط للحالات البسيطة واللي مش محتاجة قدر كبير من ال biomechanics للوصول لنتيجة كويسة. دلوقتي التقويم الشفاف ممكن يستخدم مع اكتر من 90% من حالات التقويم نتيجة لظهور تقنية الدمج او ال hybrid technique  واللي من خلالها اخصائي تقويم الاسنان بيقدر يستخدم التقويم الشفاف كأداة تقويمية بالتعاون من أجهزة تقويمية اخرى علشان يحرك الاسنان ويوصل لنتيجة جميلة من العلاج التقويمي. حتلاقي حالات ممكن تستخدم تقويم شفاف مثلا في الفك العلوي وتقويم معدني أو سيراميكي ثابت على الفك السفلي . حتلاقي حالات ممكن تركب تقويم معدني ثابت على اجزاء من الاسنان الخلفية وتقويم شفاف على بقيت الاسنان ، حتلاقي حالات ممكن تستفيد من زرعات الاسنان التقويمية أو مسامير تقويم الاسنان علشان توفر وسيلة لشد وتحريك الاسنان في اتجاهات معينة بالتعاون مع التقويم الشفاف. حتلاقي بعض الحالات الصعبة ممكن تبدأ العلاج بجهاز التقويم المعدني الثابت أو التقويم السيراميكي الثابت لمدة معينة علشان تحل بعض المشاكل الصعبة , وبعد كدة بيتم ازالة جهاز التقويم المعدني الثابت واستبداله بالتقويم الشفاف علشان تكملة العلاج التقويمي، في الحالات دي بدل ما الشخص اللي بيعمل تقويم يقعد مثلا سنة كاملة بجهاز التقويم المعدني الثابت ممكن يختصر وقت جهاز التقويم الثابت لاربع او خمس شهور و باقي المدة العلاجية يستكملها بجهاز التقويم الشفاف المتحرك. الحلول المتاحة دلوقتي مع التقويم الشفاف المتحرك اصبحت كتير ، وحسب متطلبات كل حالة وظروف الشخص اللي حيعمل تقويم اصبح دلوقتي من المتاح عمل خطة علاجية تقويمية متكاملة تعتمد على الدمج ما بين جهاز التقويم الشفاف واجهزة التقويم الاخرى بالشكل والطريقة اللي تساعد في علاج الحالة في اسرع وقت واقل تكلفة مادية.

هل فيه مخاطر أو اضرار من التقويم الشفاف ؟

التقويم الشفاف يعتبر علاج امن جدا طالما معمول بطريقة مظبوطة وتم ظبط القوة المبذولة والحركة المعمولة على الاسنان بدون تعدي المقدار المسموح بيه. وعلشان ده يتم صح ، اخصائي تقويم الاسنان بيصمم الخطة العلاجية وبيراعي ان كل قالب شفاف بيحرك الاسنان بمقدار صغير جدا من غير ما يبقى فيه تعدي لمقدار القوة التقويمية المبذولة علشان ما يبقاش في ضغط شديد على الاسنان يسبب اي نوع من انواع الضرر او التآكل سواء لجذور الاسنان أو للعضم اللي حوالين الاسنان. لو اتعمل خطة علاجية للتقويم الشفاف وحصل فيها محاولة لتقليل عدد القوالب الشفافة من اجل توفير التكلفة أو من اجل انهاء العلاج في وقت اسرع من الطبيعي ، اللي حيحصل هنا ان القوالب الشفافة حكتون شديدة على الاسنان بمعنى ان كل قالب شفاف حيعمل ضغط على الاسنان بمقدار كبير علشان يحركها بمقدار اكبر من اللي عضم الفك يسمح بيه وده ممكن يسبب الم شديد للاسنان ومشاكل تانية لجذور الاسنان او للعضم اللي حوالين الاسنان. وبالتالي اخصائي تقويم الاسنان المتمكن من العلاج بالتقويم الشفاف بيقدر يظبط مقدار القوة التقويمية ومقدار الحركة المتوقعة من كل قالب شفاف بحيث تكون متناسبة مع الحد المسموح بيه وما تسببش اي ضرر للاسنان.

الحساسية من القوالب الشفافة: حدوث تحسس من القوالب الشفافة امر نادر جدا ومع التطور في صناعة القوالب الشفافة بقى شبه مستبعد انه يحصل , لو حصل عند مريض واتسبب في اعراض حساسية المريض بيبلغ الطبيب المعالج وبيتم ايقاف العلاج ، واستكمال العلاج بنوع اخر من اجهزة التقويم.

ايه هي عيوب  التقويم الشفاف؟

التقويم الشفاف جهاز امن وفعال جدا، ومع التطورات في صناعة التقويم الشفاف والتطورات في ابحاث العلاج التقويمي اصبح التقويم الشفاف قادر على علاج اكتر من 90% من حالات تقويم الاسنان. المشكلة الاساسية مع جهاز التقويم الشفاف المتحرك هي انه معتمد على التزام المريض بارتداء جهاز التقويم الشفاف. المفترض حسب اخر الابحاث العلمية ان مريض التقويم المتحرك يرتدي جهاز التقويم الشفاف على الاسنان لمدة 22 ساعة يوميا على الأقل. جهاز التقويم الشفاف محتاج يبقى راكب على الاسنان طول الوقت علشان الاسنان تقدر تحقق الحركة التقويمية المخزنة داخل قالب التقويم الشفاف. وده معناه ان الشخص اللي بيعمل تقويم شفاف مسموح له بساعتين فقط في اليوم بالكتير علشان ياكل فيهم الوجبات المختلفة ويمارس الروتين اليومي لغسيل الاسنان وغسيل جهاز التقويم الشفاف.

 مدة ارتداء القالب الشفاف الواحد مفروض بتكون في حدود اسبوعين ، ممكن تزيد عن اسبوعين في بعض الحالات ، خلال الاسبوعين دول القالب الشفاف مفروض راكب على الاسنان لمدة 22 ساعة في اليوم. المشكلة تظهر لو المريض مش ملتزم التزام كامل في ارتداء قالب التقويم الشفاف سواء مش ملتزم بال 14 يوم كاملين أو لو ملتزم بالايام كلها بس مش ملتزم بال 22 ساعة في اليوم المطلوبين منه. اللي بيحصل هنا لو المريض ما التزمش الالتزام المطلوب ساعتها القالب الشفاف مش حيقق كل حركات الاسنان المطلوبة منه , او حيحققها بس مش بالمقدار الكامل اللي يسمح بالانتقال للقالب الشفاف اللي بعده. لما ييجي دور القالب الشفاف التالي حيلاحظ المريض ان القالب الشفاف مش بيركب بصورة كاملة على الاسنان او بيركب بصعوبة شديدة وبيعمل ضغط شديد على الاسنان , وده طبعا منطقي لأن القالب الشفاف اللي قبله ما خدش فرصته بالكامل انه يحقق الشغل المطلوب منه. لو عدم الالتزام ده حصل من المريض اللي بيعمل تقويم شفاف مرة واحدة أو في ظرف واحد ساعتها بنسبة كبيرة الموضوع حيعدي ومش حيأثر على نتيجة العلاج وحيقدر يكمل في استكمال القوالب الشفافة ويوصل للنتيجة المطلوبة. ولكن المشكلة مبقى لو المريض بطبيعته غير ملتزم وطول الوقت بيهمل في ارتداء القوالب الشفافة وشوية يلبسها وشوية يشيلها ده مش بس بيسبب ان الاسنان ما بتتحركش بالمقدار الكامل المطلوب منها ، لأ ده كمان ممكن تتحرك في اتجاهات غير مرغوب فيها وغير محسوبة في الخطة العلاجية ، ومع الانتقال للقوالب الشفافة التالية ومع الاستمرار في العلاج مع عدم الالتزام الكامل بيحصل حاجة اسمها loss of track … او ما يسمى ب (فقدان التتابع او فقدان المسار للقوالب الشفافة) … يعني المريض حيوصل عند قالب شفاف معين عليه الدور مش حيقدر انه يركبه على اسنانه علشان بقى فيه فروق وتباين ما بين شكل انتظام الاسنان وشكل القالب الشفاف. لو ده حصل في منتصف العلاج ما بيبقاش في حلول غير اخد مقاسات جديدة وعمل خطة علاجية رقمية جديدة ، وطباعة قوالب شفافة جديدة للمريض لاستكمال العلاج من المرحلة اللي وصل لها ، أو ممكن استكمال العلاج بجهاز اخر من اجهزة تقويم الاسنان زي التقويم المعدني أو التقويم السيراميكي واللي مش بتعتمد 100% على تعاون والتزام المريض لانها طبعا بتبقى متثبتة على الاسنان.

علشان كدة لازم الشخص اللي حيعمل اجراء التقويم الشفاف يكون عارف الالتزام المطلوب منه قبل ما يبدأ , ويكون واثق من ظروفه ومن قدرته انه حيقدر يلتزم بارتداء قوالب التقويم الشفاف طول الوقت اثناء مرحلة العلاج. ولازم اخصائي تقويم الاسنان يتأكد من الاستعداد ده عند المريض قبل بداية العلاج علشان ما يتعملش اجراءات علاجية غير ناجحة أو غير مؤثرة.

حاجة كمان هي ان التقويم الشفاف ما زال ليه بعض الحالات اللي ممكن قد يكون مش الافضل الاستعانة بيه, لأن بعض حركات الاسنان التقويمية بيبقى صعب تحقيقها باستخدام التقويم الشفاف المتحرك وبتحتاج لجهاز ثابت على الاسنان زي التقويم المعدني أو التقويم السيراميكي. الحالات الصعبة زي تقويم  وسحب الاسنان المدفونة أو التقويم الجراحي أو حالات بروز الاسنان الشديدة ، رغم اننا ما نقدرش نقول ان ما ينفعش نستخدم التقويم الشفاف مع الحالات دي ولكن التقويم المعدني في الحالات دي مازال ليه فاعلية وقدرة اكبر في تحقيق النتيجة العلاجية المطلوبة. ده غير ان لو استخدمنا التقويم الشفاف مع الحالات دي ممكن نحتاج عدد كبير جدا من القوالب الشفافة واللي بالطبع حيزود التكلفة المادية على المريض لأرقام كبيرة جدا. بس زي ما ذكرنا ان استخدام الhybrid technique ممكن يدمج ما بين التقويم المعدني والتقويم الشفاف وده معناه ان في الحالات الصعبة دي ممكن استخدام التقويم المعدني اثناء المراحل اللي محتاجة جهاز التقويم المعدني ، وبعد تخطي المراحل الكبيرة في العلاج ممكن يتم الانتقال للتقويم الشفاف ، وده طبعا حيقلل عدد القوالب الشفافة بنسبة كويسة جدا ،وبالتالي بيساعد ان اجمالي التكلفة المادية للعلاج تكون اقل.

ايه هي مميزات التقويم الشفاف؟

أهم ميزة في التقويم الشفاف هو الشفافية وعدم الظهور، وبالتالي الناس اللي حوالين المريض مش بتاخد بالها ان فيه قالب شفاف متركب على الاسنان بتاعت الشخص. دي تعتبر اهم ميزة للتقويم الشفاف وهي ان اي شخص سنه كبير في مرحلة التلاتينات أو الاربعينات أو الخمسينات يقدر يرتدي قوالب التقويم الشفافة ويعيش حياته ويتعامل مع الناس في البيت وفي الشغل وفي أي مكان من غير ما حد يلاحظ حاجة على اسنانه. وده اللي خلى ناس كتير في اعمار كبيرة تاخد خطوة عمل تقويم الاسنان بعد ما كانوا مترددين او مستبعدين فكرة تقويم الاسنان.

ميزة كمان من مميزات التقويم الشفاف ان الاسنان بتبدأ تتحرك في اتجاه الوضع النهائي ليها من أول يوم ، ودي ميزة منفردة للتقويم الشفاف ومش سهل تواجدها في اجهزة التقويم التقليدية زي التقويم المعدني او التقويم السيراميكي … لأن المعروف في التقويم المعدني ان لازم يتعمل مرحلة اصطفاف للاسنان في بداية العلاج قبل عمل تحريك للاسنان في اتجاهات معينة. في حالات المسافات بين الاسنان مثلا لو حنعالجها بالتقويم الشفاف : الاسنان بتبدأ تتحرك وتقرب من بعضها من أول يوم وتأثير غلق المسافات بين الانسان بيبدأ يظهر من الاسابيع الاولى لعلاج , عكس لو حنستخدم جهاز التقويم المعدني لازم يكون فيه مرحلة اصطفاف leveling and alignment والوصول لسلك تقويمي قوي نسبيا قبل ما نبدأ نقفل المسافات بين الاسنان ونحرك الاسنان ناحية بعضها. ده معناه ان التقويم الشفاف في الحالات دي ممكن يكون اسرع وياخد وقت اقل من التقويم المعدني الثابت. طبعا ده مش حاجة معممة على كل الحالات وما نقدرش نقول ان التقويم الشفاف اسرع من التقويم الثابت في كل الحالات , ولكن فيه حالات كتير دلوقتي بقى من الحكمة اننا نتعامل معاها بالتقويم الشفاف افضل من التقويم المعدني بسبب الميزة دي. كمان لو حنستخدم الدمج او ال hybrid technique اللي اتكملنا عليه ودمجنا ما بين التقويم الشفاف والتقويم المعدني ممكن يساعدنا نوصل لخطط علاجية تقويمية للاسنان تاخد وقت اقل بشكل ملحوظ من الخطط العلاجية اللي بتعتمد على نوع واحد فقط من تقويم الاسنان زي التقويم المعدني فقط او التقويم الشفاف فقط.

ميزة كمان موجودة في التقويم الشفاف المتحرك هي لو مريض تقويم عنده مشاكل في المفصل الفكي , مشاكل المفضل الفكي بتبقى مزمنة وفي بعض الأوقات ممكن يحصلها نشاط أو ظهور ، في وجود التقويم الشفاف المتحرك بيبقى سهل جدا اننا نوقف العلاج التقويمي في أي وقت علشان نعمل جهاز دعامة مفصل الفك stabilization splint  وده لأن التقويم الشفاف جهاز متحرك ومش متثبت على الاسنان … لكن لو التقويم المعدني الثابت هو اللي مستخدم بنضطر نفك جهاز التقويم المعدني المثبت على احد الفكين أو نشيله من الفكين تماما، وبعد علاج مشكلة مفصل الفك نبدأ تقويم الاسنان من أول وجديد.

ميزة اخيرة موجودة في التقويم الشفاف المتحرك هي ان اخر قالب شفاف ممكن يتم الاستفادة منه كمثبت retainer بدل من صناعة مثبت بعد العلاج وده ممكن يوفر تكلفة جهاز التثبيت على المريض.

ايه مميزات عمل التقويم الشفاف في عيادة رويال دينت ؟

1) الخطة العلاجية اللي بنعملها في عيادة رويال دينت لتقويم وتجميل الاسنان بمدينة 6 اكتوبر بتراعي الوصول لافضل نتيجة جمالية ووظيفية في نفس الوقت ، زي ما قلنا ان التقويم الشفاف وسيلة وأداة ومش مجرد غاية أو سلعة، لو حالتك حيبقى صعب انها تتعمل بالتقويم الشفاف حنشوف افضل بديل يساعدنا نوصل للنتيجة المثالية من تقويم الاسنان. وحتى لو حالتك فيها صعوبة تتعمل بالتقويم الشفاف بس نقطة شفافية جهاز التقويم عندك اساسية وليها الاولوية ساعتها حنقدر نوفر لك خطة علاجية معتمدة على الhybrid technique يكون فيها دمج ما بين جهاز التقويم الشفاف واجهزة التقويم التانية زي التقويم السيراميكي أو المعدني بحيث نخلي ظهور الاجزاء الثابتة من تقويم الاسنان اقل ما يمكن وفي نفس الوقت نعالج الاسنان تقويميا بطريقة سليمة زي ما الكتاب بيقول.

2) العلاج بيتم مع دكتور احمد مجدي استشاري تقويم الاسنان بعيادة رويال دينت ، واللي يعمل الخطة العلاجية الرقمية للتقويم الشفاف بنفسه من غير الاعتماد على اي شركات او معامل خارجية، وده بيخلينا متأكدين من كل خطوة ونتيجتها قبل ما نوصلها للمريض علشان نضمن ان الاسنان حتتحرك بالشكل المطلوب. وكمان بيخلينا متأكدين ان القوالب الشفافة اللي حتم تصنيعها مش حتتخطى مقدار القوة والحركة الفسيولوجي المسموح بيه علشان نتفادى أي اضرار غير مرغوب فيها للاسنان.

3) تعاملنا مع قوالب التقويم الشفاف مش اننا بنوفر منتج وبنسلمه للمريض ودورنا ينتهي بعد التسليم, ولكن بنتابع المريض شهريا في العيادة وما بنسلمش القوالب الشفافة الجديدة غير بعد التأكد من ان القوالب الشفافة اللي اتسلمت قبل كدة اتمت المطلوب منها وحققت الحركة التقويمية المخزنة فيها بالكامل وبقى مسموح اننا ننقل على القوالب الشفافة اللي بعد كدة

4) اي تعديلات في الخطة العلاجية أو اي اضافات أو تعديلات في الاسنان أو في جهاز التقويم الشفاف بنقدر نعملها أول بأول وفي الوقت المناسب وبالتالي ينقدر نتحكم في سير خطة العلاج ونمنع اي ( فقدان تتابع للقوالب الشفافة) محتمل.

5) افضل سعر للتقويم الشفاف في مصر وده لاننا بننتج قوالب التقويم الشفاف في المعمل الخاص بينا ومش بنعتمد على اي شركات انتاج او معامل خارجية وده بيساعدنا اننا نوفر منتج متميز بخصائص وجودة ممتازة وفي نفس الوقت بنتحكم في التكلفة. تطور صناعة التقويم الشفاف في الفترة الاخيرة وتطور الطباعة ثلاثية الابعاد ساعد على ان التقويم الشفاف بقى في المتناول ، بعد ما كان في بدايته بيكلف الاف الدولارات ومش اي حد بيقدر على سعره المرتفع , دلوقتي سعره بقى في نفس رينج اجهزة التقويم الاخرى , السعر طبعا بيعتمد على عدد القوالب الشفافة المطلوبة لعلاج الحالة ، وكل ما زاد عدد القوالب الشفافة كل ما زادت التكلفة , بس تلكفة التقويم الشفاف في الوقت الحالي عموما  اقل واحسن بكتير من التكلفة زمان في بدايات ظهور التقويم الشفاف. 

6) تقسيط التقويم الشفاف. نظرا لأن طباعة القوالب الشفافة بتكون مُكلفة على اي عيادة وخصوصا ان عيادات كتير بتعتمد على شركات متخصصة في صناعة القوالب الشفافة واللي بتاخد التكلفة كاملة في بداية العلاج من العيادات , فبالتالي العيادات بتضطر تحصل تكلفة التقويم الشفاف بالكامل من المريض مع بداية العلاج وبالتالي مش يبقى متاح تقسيط تكلفة التقويم الشفاف على مدار شهور العلاج ، ولكن عندنا في عيادة رويال دينت ولأننا بنمتلك معمل خاص متخصص في تصنيع القوالب الشفافة ومش بنعتمد على معامل أو شركات خارجية فبنقدر اننا نوفر تقسيط مباشر للتقويم الشفاف مع العيادة بالظبط بنفس طريقة التقسيط المتبعة مع الحالات اللي بتتعالج بالتقويم المعدني. وده ساعد ناس كتير تبدأ في العلاج بالتقويم الشفاف في عيادتنا بسهولة وبدون عبء مادي كبير.

7) الميزة الحصرية بعيادة رويال دينت في التقويم الشفاف ان لو حصل loss of track  لقوالب التقويم الشفاف واللي المريض بيكون مسئول عنه مسئولية كاملة ، حرصا على مصلحة المريض يتم استكمال العلاج التقويمي من خلال ا لتقويم المعدني الثابت بنفس التكلفة المتفق عليها مع المريض منذ البداية بدون اضافة اي اعباء او تكاليف مادية اخرى على المريض. هدفنا في النهاية هو رضا ومصلحة المريض  والوصول لاكبر قدر من الفائدة لعملائنا.

احجز موعدك للحصول على التقويم الشفاف من هنا